ससुराली गएका साढुदाइले गरे सढुभाइको हत्या

काठमाडौं १४ चैत । 
पर्साको जगरनाथपुरमा ससुराली गएका साढुदाइ र भाइबीच झगडा साढुुदाइले छुराले हानेर साढुभाइको हत्या गरेका छन् ।

वडा नम्बर–४, लंगडीमा रक्सी पिएपछि झगडा हुँदा छुरा प्रहार भएको हो । भारत बिहारको बेतिया जिल्ला कंगली थाना अन्तर्गत कठिया मठिया निवासी साढुदाइ बिजुली मुखिया बिनले ३० वर्षीय साढुभाइ उमेश मुखिया बिनलाई छुराले हानेर घाइते बनाएका थिए ।

उनको शरीरको तीन ठाउँमा छुरा हानिएको प्रहरीले जनायो । उपचारका अस्पतालमा लैजाँदै गर्दा बाटोमै उनको ज्यान गएको हो । जिल्ला प्रहरी कार्यालय, पर्साले बिनको हत्यामा संलग्न रहेको आरोपमा बिजुली मुखियाको खोजी भइरहेको बताएको छ ।

भारतमा अपराध गरेर लुक्न नेपाल आउने गरेका मुखियाले आफनै साढुभाइको हत्या गरेर फरार भएका छन् । प्रहरीले अनुसन्धानका लागि बिजुलीका ससुरा र सासूलाई नियन्त्रणमा लिएको छ ।

जिल्ला प्रहरी कार्यालय पर्साका प्रवक्ता प्रहरी नायव उपरीक्षक राजन लिम्बूले ससुराली पुगेका ज्वाइँहरुबीच मदिरा पिएपछि विवाद भएको र त्यसपछि बिजुलीले उमेशलाई छुरा हानेको बताउनुभयो ।